ཧི་མ་ལ་ཡའི་བོན།-དགེ་སློང་བསྟན་འཛིན་དབང་གྲགས་རིན་པོ་ཆེའི་སྐུ་གདུང་།

ཧི་མ་ལ་ཡའི་བོན།-དགེ་སློང་བསྟན་འཛིན་དབང་གྲགས་རིན་པོ་ཆེའི་སྐུ་གདུང་།:

'via Blog this'

ཞང་ཞུང་བོན་གྱི་རྒྱལ་པོ་བྱ་རུ་ཅན་བཅོ་བརྒྱད་ཀྱི་སྐུ་བརྙན་དང་འགྲེལ་བཤད་བསྡུས་པ།

རྩོམ་པ་པོ་ཁྲི་གཡུང་དྲུང།
རང་དབང་དྲ་རྒྱ་ནས་བླངས།

ཞང་ཞུང་གི་གྲགས་ཆེ་བའི་རྒྱལ་རབས་བཅོ་བརྒྱད་ཀྱི་ཐོག་མ་ཁྲི་ཝེར་གསེར་གྱི་བྱ་རུ་ཅན་དུ་གྲགས་པ་དེའི་རྒྱལ་ས་ནི། གངས་ཆེན་པོ་ཏི་སེའི་མདུན། རི་སྤོས་ངད་ལྡན་གྱི་རྩ་བ། མཚོ་མུ་ལེ་ཁྱུད་ཀྱི་ཉེ་འགྲམ། ག་ལྗང་གཡུ་ལོ་རྫོང་མཁར་ཞེས་བྱ་བ་དེ་ཡིན་ཞིང་རྒྱལ་པོ་འདི་ནི་གཤེན་རབ་མི་བོ་ཆེའི་དངོས་སློབ་དང་བོན་གྱི་བསྟན་པའི་སྦྱིན་བདག་ཁྱད་པར་ཅན་ཞིག་ཡིན་ལ། ཁོང་གིས་གངས་ཏི་སེའི་མདུན་ཞོལ་དུ་གསས་ཁང་ནོར་བུ་སྤུངས་རྩེགས་ཞེས་བྱ་བ་ཞིག་བཞེངས།
དེང་དུས་ཀྱི་དབང་དུ་བྱས་ན༼རྒྱང་གྲགས་དགོན༽ཞེས་པ་འབྲི་གུང་བཀའ་བརྒྱུད་པའི་ཆོས་རྒྱུད་ཀྱིས་ཟིན་པའི་དགོན་གཞིས་ཆུང་ངུ་ཞིག་ཡོད་པ་དེ་ཡིན་ནོ།།
སྤུངས་རྒྱུང་གྱེར་གྱི་རྒྱལ་པོ་བྱི་རུ་འོད་ཀྱི་བྱ་རུ་ཅན་དུ་གྲགས་པ་དེ་ནི་ཞང་ཞུང་པུ་མར་ཧྲེང་གི་ཡུལ་ལམ་དེང་དུས་ཀྱི་དབང་དུ་བྱས་ན་པུ་ཧྲེང་ངམ་པུ་རང་ཞེས་བྱ་བའི་ཡུལ་ཁམས་དེའི་སྟག་ཆེན་རྔམ་རྫོང་མཁར་ཞེས་བྱ་བའི་ཕོ་བྲང་དུ་བཞུགས་ནས། ཞང་ཞུང་གི་རྒྱལ་སྲིད་བསྐྱངས་མཛད་པ་དང་གུ་ཝེར་ནོར་གྱི་རྒྱལ་པོ་ག་ལྗང་འོད་ཀྱི་བྱ་རུ་ཅན་དུ་གྲགས་པ་དེ་ནི་ཞང་ཞུང་ཙི་ནའི་ཡུལ་ཤོད་དུམ་པ་ཚལ་ཏེ་དེང་དུས་ཀྱི་དབང་དུ་བྱས་ན་གུང་དུམ་དུ་གྲགས་པའི་ཡུལ་གྱི་ཕོ་བྲང་གསེར་གྱི་མཁར་ཞེས་བྱ་ བའི་ཁབ་ཏུ་བཞུགས་ནས་ཞང་ཞུང་གི་རྒྱལ་སྲིད་བསྐྱངས་མཛད་པ་དང་སྟག་སྣ་གཟི་བརྗིད་རྒྱལ་པོ་ཁྲི་ལྡེམ་ལྕགས་ཀྱི་བྱ་རུ་ཅན་དུ་གྲགས་པ་དེ་ནི་ཞང་ཞུང་ཙི་ཎའི་ཡུལ་སྤོས་རི་ངད་ལྡན་གྱི་རྩ་བ་གྲོང་ཁྱེར་སྟག་སྣ་གླིང་གི་དབུས། དེང་དུས་ཀྱི་དབང་དུ་བྱས་ན་བོན་རི་སྟག་སྣ་རོང་ཞེས་སུ་གྲགས་པ་དེར་ཡོད་པའི་སྟག་སྣ་དབལ་གྱི་རྫོང་མཁར་དུ་བཞུགས་ཏེ་ཆབ་སྲིད་ཀྱི་མཛད་པ་གནང་བ་དང་སད་ཧྲི་ གྱེར་གྱི་རྒྱལ་པོ་ཨུཏྤལ་འོད་ཀྱི་བྱ་རུ་ཅན་དུ་གྲགས་པ་དེ་ནི་ཞང་ཞུང་ཁ་ཡུག་གི་ཡུལ་མུ་རྫོང་ཆེན་པོ་ཁྲོ་ཆུའི་མཁར་ཞེས་པའི་ཕོ་བྲང་དུ་བཞུགས་ཤིང་ཆབ་སྲིད་ཀྱི་ མཛད་པ་བསྐྱངས་པ་དང་།

སླས་ཀྲ་གུ་གེའི་རྒྱལ་པོ་རིན་ཆེན་འོད་ཀྱི་བྱ་རུ་ཅན་དུ་གྲགས་པ་དེ་ནི་ཞང་ཞུང་ ཁྱུང་ལུང་གི་ཡུལ་དབུས་དངུལ་མཁར་དཀར་པོ་ཁྲོ་ཆུའི་རྨང་རྡོ་ཅན་དུ་གྲགས་པ་དེར་ བཞུགས་ནས་ཁབ་ཀྱི་མཛད་པ་བསྐྱངས་པ་དང་མུ་མར་ཐོག་རྒོད་རྒྱལ་པོ་ཨེ་ཎ་འོད་ཀྱི་ བྱ་རུ་ཅན་དུ་གྲགས་པ་དེ་ནི་ཞང་ཞུང་རུ་ཐོག་གི་ཡུལ་རུ་ཐོག་གནམ་རྫོང་མཁར་དུ་ གནས་བཅོས་ཏེ་ཆབ་སྲིད་མཛད་པའི་ཚུལ་འབེལ་གཏམ་ལུང་གི་སྙིང་བོ〔ཐོབ34ཕ8–ཐོབ་35ཕ 11〕ལས་གསལ་བ་ཡིན།

རྒྱལ་པོ་དེ་རྣམས་བྱོན་པའི་སྔ་ཕྱིའི་གོ་རིམ་དང་ལོ་དུས་སོགས་ནི་ཤིན་ཏུ་རྟོགས་དཀའ་ བའི་གནས་ཤིག་ཡིན་མོད། གངས་རིའི་དཀར་ཆག་ཏུ་རྒྱངས་རི་གཡུ་ལོ་ལྗོན་པའི་རྫོང་མཁར་གྱི་རྒྱལ་པོ་གསུམ་དང་། ཁྱུང་ལུང་རྒྱལ་བ་མཉེས་ཡུལ་གྱི་རྒྱལ་པོ་གསུམ། པུ་མར་ཧྲེང་གི་ཡུལ་གྱི་རྒྱལ་པོ་གཉིས། ཞང་ཞུང་ཙི་ནའི་ཡུལ་གྱི་རྒྱལ་པོ་གཉིས། ཞང་ཞུང་ཏ་རོག་གི་རྒྱལ་པོ་གཉིས། ཞང་ཞུང་སྟ་སྒོའི་རྒྱལ་པོ་གཉིས། ཞང་ཞུང་ཁ་ཡུག་གི་རྒྱལ་པོ་གཅིག ཞང་ཞུང་ལ་དྭགས་ཀྱི་རྒྱལ་པོ་གཅིག ཞང་ཞུང་རུ་ཐོག་གི་རྒྱལ་པོ་གཅིག་བཅས་དངོས་བསྟན་དུ་རྒྱལ་རབས་བཅུ་བདུན་གྱི་མཚན་འཁོད་ཡོད་འདུགཔ་དེ་རྣམས་ཀྱི་གྲངས་རྒྱལ་པོ་གསུམ་མམ་གཉིས། རེ་རེས་ཡུལ་རེར་རྒྱལ་དས་མཛད་ཡོད་པ་དེ་ལྟར་ན། རྒྱལ་ཐོག་གསུམ་མམ་གཉིས་སོགས་ཀྱི་རིང་ལ་རྒྱལ་རྒྱུད་བར་མ་ཆད་པས་རྒྱལ་སྲིད་ བསྐྱངས་པའི་རྒྱུ་མཚན་གྱིས་གོ་རིམ་དེ་བཞིན་དུ་འོངས་ཡོད་པའང་སྲིད།

དེ་ལྟར་ཡིན་ན་གངས་རིའི་དཀར་ཆག་ཏུ་འཁོད་པའི་རིམ་པ་དེས་ནི་རྒྱལ་ཐོག་གི་རིམ་ པའང་མཚོན་དགོས་པ་ཡིན། ཚུལ་འདི་ཕྱོགས་རེར་དེ་ལུགས་སུ་བྱུང་ཡོད་པ་ནི་ཤིན་ཏུ་ནས་ཀྱང་སྲིད་མོད། ཕྱོགས་ཀུན་ནས་མཚོན་མི་ཐུབ་པ་ནི་སྟག་སྣ་གཟི་བརྗིད་རྒྱལ་པོ་ལྕགས་ཀྱི་བྱ་རུ་ ཅན་གྱི་མཚན་ཡོད་པའི་རྒྱལ་ཐོག་གཉིས་དུས་རིམ་མི་འདྲ་བ་གཉིས་ཀྱི་ནང་དུ་བྱུང་ ཡོད་པའི་ཚུལ་དུས་རིམ་བར་མའི་ཞང་ཞུང་གི་རྒྱལ་གཤེན་བོན་གྱི་གནས་ཚུལ་བཤད་པའི་ སྐབས་སུ་གསལ་བར་སྤྲོས་ཡོད་པ་དེ་རྣམས་ཀྱིས་གོ་རྟོགས་ཐུབ་པ་ཡིན། གངས་རིའི་དཀར་ཆག་ཏུ་དངོས་བསྟན་རྒྱལ་རབས་བཅུ་བདུན་ལས་མི་གསལ་ཞིང་། སོགས་སྒྲས་རྒྱལ་པོ་གཅིག་གི་མཚན་དང་། དེའི་རྒྱལ་ས་གང་དུ་ཡིན་པ་བཅས་ངེས་དགོས་པ་དེ་ནི་ཁྲོ་འགྲེལ་དུ་ཞང་ཞུང་ཙི་ནའི་ ཡུལ་ཤོད་དུམ་པ་ཚལ་གྱི་གསེར་མཁར་དུ་གུ་ཝེར་ནོར་གྱི་རྒྱལ་པོ་ག་ལྗང་འོད་ཀྱི་ བྱ་རུ་ཅན་གྱིས་ཆབ་སྲིད་མཛད་པར་གསལ་བ་དེ་རང་དུ་ངེས་སམ་སྙམས།


རྒྱལ་པོ་དེ་རྣམས་ཀྱི་མཚན་ལ༼བྱ་རུ་ཅན༽ཞེས་པའི་ཐ་སྙད་བྱུང་ཡོད་འདུག་པ་དེའི་ དགོངས་དོན་ནི་རྒྱལ་པོ་དེ་རྣམས་ཀྱི་མཚན་དབང་ཆེ་བར་བསྟན་པའི་མཚན་རྟགས་སུ་རིན་ པོ་ཆེ་སྣ་ཚོགས་པ་ལས་གྲུབ་པའི་དབུ་ཞྭ་ཕལ་ཆེར་རྨོག་ཞུའི་དབྱིབས་འདྲ་བ་ཞིག་ལ་ གཡས་གཡོན་དུ་རྒྱལ་པོ་སོ་སོའི་མཚན་རྟགས་ལྡན་པའི་རིན་པོ་ཆེ་གསེར་དང་། ཤེལ་གྱི་རིགས། བྱི་རུ་ལ་སོགས་པའི་རྭ་ཐུང་ལ་སྦོམ་པ་རེ་ཡོད་པ་དེ་རིགས་ལ་ཟེར་ཞིང་། དབུ་ཞྭའམ་དབུ་རྨོག་འདི་ནི་རྒྱལ་པོ་ཙམ་དུ་མ་ཟད་གནད་ཆེ་བའི་གཤེན་པོ་རྣམས་ལའང་ ཡོད་པ་སྟེ། ཞང་ཞུང་མེ་རིའི་བླ་མ་བརྒྱུད་པའི་བྲིས་ཐང་རྣམས་སུ་གསལ་པོར་མཇལ་རྒྱུ་ཡོད། ཚུལ་འདིའི་སྐོར་འབེལ་གཏམ་ལུང་གི་སྙིང་བོ〔ཐོབ36ཕ20〕ལས་འདིར་བཤད་བྱ་རུ་ཞེས་ པའི་གོ་གནས་ཀྱི་ཐོབ་ཐང་ལ་བྱུང་བའི་རྟགས་ཏེ་བྱ་ཁྱུང་གི་རྭ་ཡི་དབྱིབས་ལྟ་བུ་ དབུ་རྒྱན་བཟོ་བའི་སྲོལ་འདུག་ཅིང་།



གཞན་ཡང་མི་ཡི་རྒྱལ་པོ་རྣམས་ཀྱི་ཆེ་རྟགས་ཙམ་དུ་མ་ཟད་མཆོད་པའི་ཞིང་དང་བཀུར་ བའི་གནས་ལ་ཡང་བརྒྱན་སྲོལ་ཡོད་དོ། མཆོད་རྟེན་གྱི་རྩེ་ལ་བྱ་རུ་ཁྱུང་རུས་བརྒྱན་པ་དང་། ཡི་དམ་ཁྲོ་བོའི་འཁོར་འགའ་ལ་ཡང་དབུ་ལ་གནམ་ལྕགས་བྱ་རུ་ཁྱུང་རུ་འཁྲུངས་ཞེས་ དང་། རྣམ་དག་སྒྲུབ་པ〔ཤ312〕བྱ་རུ་ཐོབ་པའི་གཤེན་བརྒྱད་དེ། འགྱུར་མེད་གསེར་གྱི་བྱ་རུ་ཅན། ཞེས་སོགས་བརྒྱད་བཤད་དོ། བྱ་ཡི་སྤྱི་རྗེ་ཁྱུང་ཡིན་པར་བཤད་ཅིང་། དེ་ཡི་མགོའི་གཡས་གཡོན་དུ་རྭ་ཡི་རྣམ་པ་ཅན་ཕྲ་སྦོམ་དང་རིང་ཐུང་གི་ཚད་དབྱིབས་ སོགས་གསལ་བར་བཤད་པ་དཀའ་ཡང་བློ་ཡིས་རགས་ཙམ་དཔྱད་ཚེ་བྱ་རྒྱལ་ཁྱུང་གི་རུ་ལ་བྱ་ རུ་ཞེས་དང་། བྱ་ཁྱུང་གི་རུ་དབྱིབས་མཚུངས་པས་ཁྱུང་རུ་ཞེས་བརྗོད་པའི་ཕྱིར། ཞེས་པས་ཀྱང་ཤེས་ཐུབ་པ་ཡིན། བྱ་རུ་ཅན་བཅོ་བརྒྱད་དུ་གྲགས་པའི་རྒྱལ་པོ་འདི་རྣམས་ཀྱིས་ཞང་ཞུང་གི་རྒྱལ་ཁམས་ ཇི་ལྟར་དབང་བསྒྱུར་ཡོད་པའི་སྐོར་འདི་ལ་མཁས་པ་རྣམས་ཀྱི་བཞེད་ཚུལ་མི་འདྲ་བ་ འགའ་རེ་བྱུང་ཡོད། ཚངས་དབྱངས་ཡིད་འཕྲོག་ལས་ཞང་ཞུང་སྲིད་པའི་རྒྱལ་པོ་ཁྲི་ཝེར་ནས་བཟུང་། རྒྱལ་པོ་རྣམས་ཀྱི་མཚན་རིམ་པར་བཀོད་པ་དེས་རྒྱལ་སྲིད་ཀྱི་རྒྱུད་རིམ་ཡང་ཤུགས་ ཀྱིས་མཚོན་པའི་ལུགས་སུ་གནང་ཡོད་ལ། འདུལ་རྒྱུད་ཀྱི་དྲང་སྲོང་གྲགས་ཆེ་བ་ རྣམས་ཀྱི་ཡོན་བདག་རྒྱལ་པོ་སུ་ཡིན་པའི་རིམ་པས་ཀྱང་ཅུང་ཟད་ཞལ་གསལ་དུ་བཏང་ཡོད།


བཞེད་ཚུལ་མི་འདྲ་བ་གཅིག་ནི་བོན་གྱི་བསྟན་འབྱུང་ཉུང་བསྡུས〔ཐོབ624ཤ36བ3〕ལས་ འདི་བྱོན་ཚུལ་ནི་སྐབས་འགར་གཉིས་གསུམ་ཙམ་མཉམ་སྡེབས་དང་། སྐབས་འགར་རེ་རེ་བྱོན་ནོ། ཞེས་གསུངས་སྟངས་འདི་ལ་དཔྱད་ན་རྒྱལ་ས་དང་། མཚན་ཐ་དད་པའི་རྒྱལ་པོ་དེ་རྣམས་ཀྱི་གདུང་རྒྱུད་ཀྱང་མི་འདྲ་བ་ཐ་དད་པ་དང་། བྱུང་དུས་ཀྱང་མཉམ་མི་མཉམ་ཅི་རིགས་ཤིག་བྱུང་ཡོད་པར་བཞེད་པ་འདྲ་ཞིག་སྣང་། ཞང་ཞུང་གི་ཡུལ་ཐ་དད་དུ་བྱུང་བའི་རྒྱལ་པོ་དེ་རྣམས་གདུང་རྒྱུད་ཐ་དད་པའི་རྒྱལ་ རྒྱུད་མི་འདྲ་བ་དག་ཡིན་པ་དང་ཞང་ཞུང་སྲིད་པའི་རྒྱལ་པོ་ཞེས་པའི་མཚན་གྱི་ཆེ་བ་ དང་ལྡན་པ་དེ་རྣམས་ཀྱིས་ཞང་ཞུང་གི་མངའ་ཁོངས་ཡོངས་སུ་རྫོགས་པ་དབང་དུ་བསྒྱུར་ ཡོད་པ་ནི་ཤིན་ཏུ་ནས་ཀྱང་འཐད་མོད། བྱ་རུ་ཅན་གྱི་རྒྱལ་པོ་དེ་རྣམས་སྲིད་པའི་རྒྱལ་པོའི་མཚན་དབང་ཅན་ཤ་སྟག་ཡིན་ སྟབས་དེ་རྣམས་དུས་མཉམ་དུ་བྱུང་ཞིང་ཞང་ཞུང་ཁག་བགོས་ཏེ་རྒྱལ་སྲིད་བསྐྱངས་ཡོད་ པ་ནི་མི་འཚམ་པ་ཞིག་སྟེ།


དེ་ལྟར་ན་རྒྱལ་པོ་དེ་རིགས་ལ་སྲིད་པའི་རྒྱལ་པོའི་མཚན་འབྱུང་མི་སྲིད་པ་ཡིན། རྒྱལ་པོ་སོ་སོའི་མཚན་གྱི་ཁྱད་ཆོས་སུ་ཡུལ་ཁམས་དང་རྒྱལ་སའི་མིང་གིས་མཚན་པ་དེ་ནི་རྒྱལ་པོ་དེའི་གདུང་རྒྱུད་ཀྱི་ཁུངས་སམ་རྒྱལ་པོའི་བཞུགས་གནས༼རྒྱལ་པོའི་ཁབ༽ ཅེས་པ་དེ་གང་དུ་ཡིན་པ་བསྟན་པའི་ཚིག་ཙམ་ཞིག་ཏུ་ངེས་སམ་སྙམ་ཞེས་པ་སོགས་ནི་མཁས་དབང་ནམ་མཁའི་ནོར་བུའི་གསུངས་རྩོམ་ལས་བཏུས་ཏེ་བཀོད་པ་ཡིན་ནོ།། །།

tibetculture4

ཡིག་བརྒྱའི་འགྲེལ་བ་བཞུགས་སོ།

ཡིག་བརྒྱ་བཞུགས་སོ།
{(ཞང་ཞུང་སྐད་དུ།)བསྭོ་མུ་ཡེ་སྤྲོས། ཁྱུང་ཡེ་ལམ། ཏྲི་ཁྲི། ཏར་དར། བསམ་པ་འོད་དཔག་རམ་སྭཧཱ། བསྭོ་དམུ་ར་ཏ་ཧན། ཝེར་ནི་བྲུམ་ཧྲུན། མུ་ཏྲེ་མུ་ཏྲེ། དམུ་ར་མི་ཏྲེ། མུ་ཡེ་མུ་ཡེ། ཧ་ར་མུ་ཡེ། མུ་སྤྲོས་མི་སྤྲོས། ཝེར་རོ་མུ་སྤྲོས། མུ་ནི་གྱེར་རོ། ཡེ་ཁྱབ་ཁ་རོ། སྤྲོས་བདལ་ཧྲི་ཧྲོ། ཝེར་ནི་ཝེར་རོ། ཤུ་ལ་ཝེར་རོ། ན་ཧུ་ཏ་ཀ། ཤུད་དྷོ་ཤུད་དྷོ།་དུ་ཤུད་དྷོ་ཡ། སལེ་སལེ། ཏྲི་སལེ་ཡ། སངེ་སངེ་སུ་སངེ་ཡ། དམུ་ར་ཏ་ཧན། ཁྲི་ཙེ་དྲུང་མུ། ཧ་ཧ་བྲུམ་བྲུམ། ཧོ་ཧོ་ལམ་ལམ། ཧཱུྃ་ཧཱུྃ་ཕཊ་ཕཊ། }
(བཀའ་འགྱུར་ལས་དྲངས།)
རྗེ་གཅིག་གཤེན་རབ་རྣམ་པར་རྒྱལ། འགྲོ་བའི་དོན་དུ་ཐུགས་རྗེས་སྟོབས་བཞི་བཤད། ཡོན་ཏན་དེ་ཡིས་སྒྲིབ་པའི་ཚོགས་རྣམས་བྱང༌། སྙིང་པོ་ངེས་པའི་དོན་དུ་གཟུངས་བཤད་པ། རྣམ་དབྱེ་ཅི་ལགས་ཁོ་མོས་ཅུང་མ་འཚལ། གསལ་ལ་ཞིབ་ཏུ་སྤྲོས་ལ་བཤད་དུ་གསོལ། དེ་ལ་སྟོན་པ་གཤེན་རབ་ཀྱིས་བཀའ་བརྩལ་པ། རིགས་ཀྱི་བུ་མོ་དེ་དེ་བཞིན་ནོ། གསལ་བར་དབྱེ་བ་འདི་ལྟ་སྟེ། །བསྭོ་ནི་སྔགས་ཀྱི་འགོ་འདྲེན་ཡིན། སྐུ་གསུམ་འོད་ཟེར་སྤྲོས་པའི་སྒྲའོ། དམུ་ར་ཏ་ཧན་ནི་གཤེན་རབ་མི་བོ་ཉིད་དོ། ཝེར་ནི་རྣམ་པར་རྒྱལ་བའི་སྒྲ། བྲུམ་ནི་ཞིང་ཁམས་གཞལ་ཡས་གྲུབ། ཧྲུན་ནི་བརྟན་པར་བཞུགས་སུ་གསོལ། མུ་ཏྲེ་རྣམ་པ་གཉིས་གནས་པ། ངོ་བོ་ཉིད་སྐུ་བོན་གྱི་སྐུ། ཟག་མེད་རྣམ་དག་རང་བཞིན་དང༌། སེམས་བྱུང་ཡེ་ཤེས་བོན་གཉིས་སོ། དམུ་ར་གཤེན་ཉིད་དེའི་ངོར་གྲུབ། མུ་ཏྲེ་སངས་རྒྱས་ཐམས་ཅད་ཀྱི། ཡེ་ཤེས་བསྐྱེད་ཡུལ་རྣམ་པར་སྣང༌། འདྲེན་པ་རྣམས་ཀྱི་རྣམས་ཀྱི་རྟོགས་བྱ་ལ། བོན་སྐུའི་རང་བཞིན་ཉིད་དུ་བསྟན། མུ་ཡེ་རྣམ་པ་གཉིས་གང་དག རྫོགས་སྐུ་ཉིད་དང་ངེས་པའི་སྐུ། རྫོགས་ནི་མཚན་ཉིད་ལོངས་སྤྱོད་རྫོགས། ངེས་པའི་སྐུ་འཁོར་བོན་གནས་དུས། ཧ་ར་ཡེ་ཤེས་ལྔ་པོ་ལས། མུ་ཡེ་དེ་བཞིན་འགྱུར་མེད་དུ། མཁའ་གནས་ས་བཅུ་སེམས་དཔའ་ཡིས། རྣམ་འདྲེན་སྤྱོད་ཡུལ་ཚོགས་ཀྱི་ཞིང༌། རྫོགས་སྐུའི་ཁྱད་པར་ཉིད་དུ་བསྟན། མུ་སྤྲོས་རྣམ་པ་གཉིས་བསྟན་དག སྤྲུལ་སྐུ་ཉིད་དང་མ་ངེས་སྐུ། དང་པོ་སྟོན་མཆོག་ཉིད་ཡིན་ཏེ། གཉིས་པ་དེ་ལས་ངེས་མེད་སྤྲུལ། ཝེར་རོ་རྒྱལ་པོའི་ལམ་ལྔའི་དག མུ་སྤྲོས་དེ་བཞིན་གྲངས་མེད་དུ། སོ་སོའི་ཁམས་ཀྱི་གདུལ་བྱ་ལ། མཛད་པ་ཐེག་པ་སྟོན་པ་རྣམས། གཅིག་ལས་འབུམ་སྤྲོས་སྤྲུལ་སྐུའོ། མུ་ནི་གནས་ལུགས་ངོ་བོ་ཉིད། ནི་ནི་དོན་དམ་ཇི་ལྟ་བ། གྱེར་རོ་ཇི་སྙེད་མཁྱེན་པའི་བོན། ཡེ་ནི་འདུལ་ཞིང་མཁའ་མཉམ་ལ། ཁྱབ་བྱེད་འདུལ་བྱེད་སྟོན་པ་སྟོང༌། ཁ་རོ་འོད་ཟེར་འགྱེད་པའོ། སྤྲོས་པ་གཡུང་དྲུང་སེམས་དཔའི་ཚོགས། བདལ་པ་འདུལ་ཞིང་རབ་འབྱམས་བློ། ཧྲི་ཧོ་རིག་པའི་ཡེ་ཤེས་བསྐྱེད། ཝེར་ནི་རྒྱལ་ནི་རྣམ་པར་རྒྱལ། དེ་ཡང་རང་བཞིན་དང་ནི་བདུད། ཤུ་ལ་ཝེར་རོ་བགེགས་ལས་རྒྱལ། ན་ཧུ་ཏ་ཀ་སྡིག་ཐམས་བཅད། ཤུདྷོ་ཁྲུས་དང་ཡེ་ཤེས་ཁྲུས། དུ་ནི་ཞེ་སྡང་དམྱལ་བ་དག ཤུདྷོ་ཡ་ནི་དི་ཡི་ཁྲུས། སལེ་གསལ་དང་ཡེ་ཤེས་གསལ། ཏྲི་ནི་འདོད་ཆགས་བགེགས་ཡིད་དྭགས། སལེ་ཡ་ནི་ཡོངས་དག་བྱེད། སངེ་དག་དང་རྣམ་པར་དག སུ་ནི་གཏི་མུག་དོན་བྱོལ་སོང༌། སངེ་ཡ་ཡིས་རྣམ་སང་བྱེད། དམུ་ར་ཏ་ཧན་ཞེས་པ་ནི། བདག་དང་བདག་ལ་སོགས་པ་ཡི། རྫོགས་པའི་སངས་རྒྱས་སྟོང་རྩ་གཅིག། ཁྲི་རྩེ་དྲུང་མུ་ཞེས་པ་ནི། འབྲས་བུ་གཡུང་དྲུང་ཐོབ་པར་བྱེད། ཧ་ཧ་ཐབས་ལས་ཤེས་སྦྲེལ། བྲུམ་བྲུམ་ཞིང་ཁམས་མཐའ་ཡས་བསྒྲུབས། ཧོ་ཧོ་སྐུ་ལས་སྐུ་བསྐྱེད་པས། ལམ་ལམ་འགྲོ་དོན་འགགས་པ་མེད། ཧཱུྃ་ཧཱུྃ་ཐུགས་ལས་ཐུགས་རྗེ་སྤྲུལ། ཕཊ་ཕཊ་དྲག་པོའི་འཕྲིན་ལས་ཀྱིས། ཞི་བས་མ་ཐུལ་ལོག་པ་རྣམས། ཁྲོ་བོས་སྐུ་སྤྲུལ་བསྒྲལ་བར་བྱེད། དེ་ལྟར་གཟུངས་ཀྱི་དེ་ཉིད་ལས། ཐམས་བཅད་བཤད་ཀྱི་མི་ལང་ཡང༌། ཞུས་རྣམས་མོས་པ་མི་བཅག་ཕྱིར། མདོར་བསྡུས་ཅུང་ཟད་བསྟན་པའོ། སེམས་ཀྱི་དཀྱིལ་དུ་ཕོབ་པར་གྱིས། ཞེས་སྟོན་པ་གཤེན་རབ་མི་བོས་བཀའ་བསྩལ་བའོ།

བྱམས་མའི་སྔགས་བསྟོད་ཀྱི་འགྲེལ་བ།

(ཀུན་སྐྱོབས་བྱ་མ་སྔགས་བསྟོད་ཀྱི་ཚིག་དོན་མདོ་ཙམ་བསྟན་པའི་བསྡུས་འགྲེལ་ཐར་ལམ་ཐེམ་སྐས། ལས་དྲངས)
༑༑ མ་མཆོག་དུས་གསུམ་རྒྱལ་བའི་ཡུམ་ཆེན་མོ། བདེ་བར་གཤེགས་པ་བླ་ན་མེད་པ་ཡང་དག་མངོན་པར་རྫོགས་པའི་སངས་རྒྱས་བྱམས་མ་ཆེན་མོ་ཡུམ་ལ་ཕྱག་འཚལ་ལོ། ཞེས་པ་ནི། རྒྱལ་བ་ཀུན་གྱི་ཐུགས་ཉིད་ཡེ་ཤེས་ཀྱི་ངོ་བོ་འབྱུང་གནས་ཐིམ་གསུམ་བྱེད་པའི་སྟོང་ཆ། བོན་ཉིད་ཀྱི་ངོ་བོ་དེ་དག་འགྲོ་བ་སེམས་ཅན་ཀུན་ལ་བུ་གཅིག་གི་མ་ལྟར་བརྩེ་བས་གཟིགས་ཕྱིར་ལྷ་མོའི་ཚུལ་དུ་བསྟན་པར་མཛད་པའི་མཆོག འདས་དང་མ་འོངས་ད་ལྟ་དུས་གསུམ་གྱི་སངས་རྒྱས་སྒྲིབ་གཉིས་བག་ཆགས་དང་བཅས་པའི་གཡུལ་ལས་རྣམ་པར་རྒྱལ་བའི་མཚན་རྟགས་འཆང་བའི། སྐུ་གསུམ་སངས་རྒྱས་ཐམས་ཅད་ཀྱི་བསྐྱེད་པའི་ཡུམ་ཆེན་མོ་ཞེས་པའོ། སྤྱིར་ཡེ་ཤེས་ཀྱི་ལྷ་ལ་ཕོ་མོ་སྐྱེ་གནས་ཀྱི་མཐོ་དམན་གྱི་དབྱེ་བ་མེད་རུང༌། ངོ་བོ་གསལ་སྟོང་གཉིས་ཀྱི་ཁྱད་པར་ཚུལ་ཙམ་དུ་བསྟན་པའོ། སྐུ་གསུམ་ཀྱང་ཐོས་ཆུང་འགའ་ཞིག་གིས་སོསོར་སྐུ་མདོག་ཕྱག་མཚན་རེ་ཡོད་པར་འདོད་ཀྱང༌། དོན་དུ་དབྱིངས་ལས་ཡེ་ཤེས་ཀྱི་རོལ་གར་བསྟན་པའི་ཡེ་ཤེས་ཀྱི་ངོ་བོ་དེ་ཉིད་ལ་སྐྱེ་མེད་བོན་སྐུ་བྱ་ཞིང༌། ཡེ་ཤེས་དེ་ཡི་རང་མདངས་སམ་འོད་ལས་ས་བཅུའི་སེམས་དཔའ་དང༌། སངས་རྒྱས་ཕན་ཚུན་གྱི་གཟིགས་སྣང་འཆར་བའི་མཚན་དཔེའི་བརྒྱན་པའི་སྐུ་ལ་ལོངས་སྤྱོད་རྫོགས་པའི་སྐུ་དང༌། དེའི་སྤྲུལ་པའི་འོད་ཟེར་གདུལ་ཞིང་སེམས་ཅན་གྱི་བློ་ངོར་གང་འདུལ་དུ་བསྟན་པའི་སྤྲུལ་པའི་སྐུའོ། བོན་ཉིད་དབྱིངས་སུ་བདེ་བ་ཆེན་པོ་རུ་གཤེགས་པ་ལགས་ཀྱང༌། ཀུན་གྱི་སྐྱབས་མཆོག་བླ་ན་གཞན་ནས་སྲིད་དུ་མེད་པས། སྒྲིབ་གཉིས་མ་དག་པའི་དྲི་མ་ཡོང་ནས་ཡོངས་སུ་དག་པ་ཡོན་ཏན་ཐམས་ཅད་ཡོངས་སུ་རྫོགས་པའི་སྐུ་ལ་སྐྱོན་རྣམས་སངས་ཤིང་སྤངས་རྟོགས་ཀྱི་ཡོན་ཏན་ཐམས་ཅད་རྒྱས་པ། འཁོར་འདས་ཀུན་ལ་བུ་ལྟར་བྱམས་ཤིང་མ་ལྟར་བརྩེ་བ་ཆེན་མོས་ནམ་ཡང་མི་འདོར་བའི་ལྷ་མོ་རྒྱལ་བའི་ཡུམ་ཆེན་དེ་ལ་རྟག་ཏུ་གུས་པས་ཕྱག་འཚལ་ལོ། ཞེས་པའོ།།
དེའི་སྔགས་སམ་སྙིང་པོ་ནི། ཨཱོཾ་མ་བ་མ་དེ་མ་ཧི་མོ་ཧ་ཨེ་མ་ཧོ་མ་ཡེ་རུ་པ་ཡེ་ཏ་འདུ་འདུ་སཱ་ཧཱ། ཞེས་པ་དེའི་དོན་ཡང༌།
ཨཱོཾ་ནི་ཀུན་གསལ་བྱམས་མ་ཆེན་མོ།
།ཐབས་ཆེན་སྨོན་ལམ་ཐུགས་རྗེ་ཉི་མ།
།སྟོབས་ཀྱི་བྱམས་མ་སྐུ་ལྔ་མཆོག་གི
།རྒྱས་པ་འབུམ་བདག་ཡུམ་ལ་ཕྱག་འཚལ།། ཞེས་བྱ་སྟེ།
ཨཱོཾ་ནི་སྐུ་ལྔ་ཚངས་པའི་སྙིང་པོ་སྟེ། ཐམས་ཅད་ཀུན་གསལ་བོན་སྐུ་ཤེས་རབ་བྱམས་མ་ཆེན་མོ་དང༌། རྫོགས་སྐུ་ཐབས་ཆེན་བྱམས་མ། སྤྲུལ་སྐུ་སྨོན་ལམ་བྱམས་མ། མངོན་བྱང་ཐུགས་རྗེའི་ཉི་མ་ལྟར་མཁའ་འགྲོ་ཡོངས་ཀྱི་གཙོ་མོར་གྱུར་པ་སྟེ། ཡུམ་ཆེན་ཀྱེ་མ་འོད་མཚོ་རུ་གྲགས་པའོ། བདེ་ཆེན་གྱི་སྐུ་སྣང་སྲིད་སྟོབས་ཆེན་གྱི་བྱམས་མ་སྟེ། སྐུ་ལྔ་མཆོག་གི་ངོ་བོ་དང་རང་བཞིན་རྒྱས་པར་བསྟན་པ། ཁམས་བརྒྱད་བླ་ན་མེད་པའི་འབུམ་དང༌། གཡུང་དྲུང་ས་བཅུའི་ལམ་འབུམ། རྣམ་དག་ཚུལ་ཁྲིམས་འདུལ་འབུམ། ཡེ་གཤེན་བཀོད་པ་དོན་འབུམ། དགེ་རྒྱས་ཚོགས་ཆེན་རྫོགས་འབུམ་སྟེ། འབུམ་སྡེ་ལྔ་ཡི་མངའ་བདག་དུ་གྱུར་བའི་ཡུམ་ཆེན་དེ་ལ་ཕྱག་འཚལ་ལོ། ཞེས་པའོ།།
མ་ནི་སྐྱེ་མེད་གདོད་དག་བོན་སྐུ།
།དྲན་པས་དགྲ་ཡི་འཇིགས་སྐྱོན་བཟློག་མ།
།ཀུན་ཁྱབ་སངས་རྒྱས་སྐྱེད་བྱེད་བདག་ཉིད།
།འབུམ་གཟུངས་མདོ་གསུམ་ཡུམ་ལ་ཕྱག་འཚལ།། ཞེས་བྱ་སྟེ།
མ་ནི་འབུམ་ལྟར་ན། སྐྱེ་མེད་གདོད་དག་སྲིད་ཁམས་བོན་སྐུར་བསྟན་པའི་ཡུམ་དང༌། གཟུངས་ལྟར་ན། ཡིད་ལ་དྲན་པ་དང་གསོལ་བ་གདབ་པས་གཟུགས་ཅན་མི་དང་གཟུགས་མེད་ལྷ་འདྲེ་འབྱུང་ལྔ་དང་བཅས་པའི་དགྲ་ཡིས་འཇིགས་པའི་སྐྱོན་ཐམས་ཅད་ཕྱིར་ལ་བཟློག་པར་བྱེད་པའི་བྱམས་མ་སྟེ། དགྲ་ཡི་འཇིགས་པ་སྐྱོབས་མའོ། མདོ་ལྟར་ན། ཀུན་ཁྱབ་ཀུན་ཏུ་བཟང་མོ་ཞེས། གདོད་མའི་སངས་རྒྱས་ཀུན་ཏུ་བཟང་པོ་བསྐྱེད་པར་བྱེད་ྭཔའི་བདག་ཉིད་ཀྱི་ཡུམ་ཆེན་མོ། ཡུམ་དེ་གསུམ་གཙོས། འབུམ་གཟུངས་མདོ་གསུམ་གྱི་ཡུམ་རྣམས་ལ་རིམ་བཞིན་ཕྱག་འཚལ་ལོ། ཞེས་པའོ།
བ་ནི་འགག་མེད་བོན་སྐུའི་རྩལ་མཆོག
།བརྩེ་བའི་བྱད་དང་རིགས་སྔགས་གཅོད་མ།
།ཀུན་ལྡན་ཡུམ་ཆེན་ཐར་པའི་ལམ་འདྲེན།
།སྐུ་གསུམ་དོན་ལྡན་ཡུམ་ལ་ཕྱག་འཚལ།། ཞེས་བྱ་སྟེ། བ་ཡི་ས་བོན་ནི། འབུམ་ལྟར་ན་འགག་མེད་རིན་པོ་ཆེ་རྒྱུན་ཁམས་ཀྱི་ཡུམ་བོན་སྐུའི་རྩལ་ལས་ཡེ་ཤེས་སུ་ཤར་བའི་ཡུམ་མཆོག་ཅེས་པའོ། གཟུངས་ལྟར་ན། བརྩེ་བའི་བྱད་དང་ཅེས་པ། གནོད་ཅིང་འཚེ་བའི་བྱད་ཁ་དང་སྦོད་གཏོང་རིགས་སྔགས་ཀྱི་བྱོལ་ཟོར་ཐམས་ཅད་ཚར་གཅོད་པའི་བྱམས་མ་སྟེ། བྱད་ཀྱི་འཇིགས་སྐྱོབས་མའོ། མདོ་ལྟར་ན། ཀུན་ལྡན་ལྷུན་གྲུབ་ཀྱི་བྱམས་མ་ཞེས། ཚེ་ལོ་དཔག་མེད་ཀྱི་སངས་རྒྱས་བསྐྱེད་པའི་ཡུམ་ཆེན་ཐར་པའི་ལམ་འདྲེན་མའོ། བོན་ལོངས་སྤྲུལ་པའི་སྐུ་གསུམ་གྱི་དོན་རྟགས་དང་ལྡན་པའི་ཡུམ་ལ་ཕྱག་འཚལ་ལོ། ཞེས་པའོ།།
མ་མཆོག་ཚད་མེད་རྫོགས་སྐུ་ཆེན་མོ།
།བུ་འདོད་འགྲོ་ལ་རྒྱལ་རིགས་སྟེར་མ།
།ཀུན་བསྐྱེད་སེམས་ཅན་དོན་ལ་བརྩེ་མཛད།
།དོན་གསུམ་མངའ་བདག་ཡུམ་ལ་ཕྱག་འཚལ།། ཞེས་བྱ་སྟེ། འབུམ་ལྟར་ན། མ་མཆོག་སྣང་བའི་ཁམས་ཚད་མེད་བཞི་ལྡན་ལོངས་སྤྱོད་རྫོགས་པའི་སྐུ་ཡི་ཡུམ་ཆེན་མོ། ཞེས་པའོ། གཟུངས་ལྟར་ན། སེམས་ཉམ་ཐག་བུ་འདོད་པའི་འགྲོ་བ་རྣམས་ལ་ཆེ་བ་རྒྱལ་རིགས་ལ་སོགས་རིགས་བཟང་སྲིད་ཀྱི་དངོས་གྲུབ་སྟེར་བའི་བྱམས་མ་སྟེ། རིགས་ཀྱི་འཇིགས་སྐྱོབས་མའོ། མདོ་ལྟར་ན། ཀུན་བསྐྱེད་སྲིད་གསུམ་བྱམས་མ་ཞེས། ཚེ་ལོ་འབུམ་དུས་ཀྱི་སེམས་ཅན་ལ་བརྩེ་མཛད་ཀྱི་སངས་རྒྱས་བསྐྱེད་པའི་ཡུམ་སྟེ། བདག་དོན་ལྷུན་འགྲུབ་གཞན་དོན་མཐར་ཕྱིན་གཉིས་དོན་གསུམ་བླ་མེད་འབྱུང་བའི་མངའ་བདག་ཡུམ་ལ་ཕྱག་འཚལ་འདུད་དོ། ཞེས་པའོ།
དེ་དོན་རྫོགས་སྐུ་རྟོགས་པའི་ཡེ་ཤེས།
།མཛེ་དང་སུར་ཡ་ཀླུ་གདོན་འདུལ་མ།
།ཀུན་གྲོལ་འཁོར་བའི་སྡུག་བསྔལ་ཞི་བྱེད།
།རྣམ་གསུམ་གདོན་འདུལ་ཡུམ་ལ་ཕྱག་འཚལ།། ཞེས་བྱ་སྟེ།
དེ་ཡི་ས་བོན་ནི། འབུམ་ལྟར་ན། སྟོང་པ་ཉིད་ཀྱི་ཁམས་དོན་དམ་མཚན་མ་དངོས་པོ་མེད་པར་རྫོགས་སྐུར་རྟོགས་པའི་ཡེ་ཤེས་སུ་བསྟན་པའི་ཡུམ་མོ། གཟུངས་ལྟར་ན། ནད་ངན་པ་མཛེ་དང་སུར་ཡ་སོགས་ཀླུ་ཡི་གདོན་རྣམས་འདུལ་བ་སྟེ། ཀླུ་ཡི་འཇིགས་སྐྱོབས་མའོ། མདོ་ལྟར་ན། ཀུན་གྲོལ་ཐོག་མེད་བྱམས་མ་ཞེས། ཚེ་ལོ་བརྒྱད་ཁྲིའི་དུས་ཀྱི་འཁོར་བའི་སྡུག་བསྔལ་ཞི་བྱེད་ཀྱི་སངས་རྒྱས་བསྐྱེད་པའི་ཡུམ་མོ། ས་ཡི་སྟེང་འོག་བར་རྣམ་པ་གསུམ་གྱི་གདོན་འདུལ་བའི་ཡུམ་ལ་ཕྱག་འཚལ་འདུད། ཅཻས་པའོ།
མ་གཅིག་སྤྲུལ་སྐུའི་ལམ་འབྲས་ཉིད་ནི།
།མུ་སྟེགས་ཕ་རོལ་རྒོལ་བའི་གཤེད་མ།
།ཀུན་མཁྱེན་ཐམས་ཅད་ཡུམ་གྱུར་ཇོ་མོ།
།རྟགས་གསུམ་སྟོན་མཛད་ཡུམ་ལ་ཕྱག་འཚལ།། ཞེས་བྱ་སྟེ།
མ་ཡི་ས་བོན་ནི། འབུམ་ལྟར་ན། ཀུན་གྱི་མ་གཅིག་སོ་སོར་གསལ་བའི་ཁམས་སྤྲུལ་སྐུའི་ཁམས་ཀྱི་འབྲས་བུར་བསྟན་པའི་ཡུམ་ཉིད་དོ། གཟུངས་ལྟར་ན། མུ་སྟེགས་ལ་སོགས་ཀྱི་ཕ་རོལ་གྱི་རྒོལ་བའི་རིགས་ཐམས་ཅད་ཚར་ཐག་བཅད་པའི་གཤེད་མ་ལྟ་བུ་སྟེ། བློ་འཕེལ་མུ་སྟེགས་འཇིགས་སྐྱོབས་མའོ། མདོ་ལྟར་ན་ཀུན་མཁྱེན་ཡེ་ཤེས་བྱམས་མ་ཞེས། ཚེ་ལོ་ཁྲི་བའི་དུས་ཀྱི་སྟོན་པ་སངས་རྒྱས་ཐམས་ཅད་ཀྱི་ཡུམ་དུ་གྱུར་བའི་ཇོ་མོ་ཞེས་པའོ། ཕོ་ཐམས་ཅད་ཀྱི་སྔ་ཤོས་དང༌། ཆེ་ཤོས་ལ་ཇོ་བོ་ཞེས་བྱ་བ་ལྟར་དུ། འདི་ཡང་དུས་དེ་ཡི་ལྷ་མོའི་སྔ་མ་དང་ཆེ་ཤོས་སུ་བསྟན་པའོ། མཁའ་ཀློང་དབྱིངས་གསུམ་ལ་རྫུ་འཕྲུལ་ཐོགས་པ་མེད་པའི་རྟགས་གསུམ་མངོན་དུ་སྟོན་པར་མཛད་པའི་ཡུམ་དེ་ལ་ཕྱག་འཚལ་ལོ། ཞེས་སོ།
ཧི་ནི་སྤྲུལ་སྐུ་རིག་པའི་ཁམས་ཉིད།
།མི་གཙང་སྐྱོན་རྣམས་འཇོམས་པར་མཛད་མ།
།ཀུན་སྐྱོབས་གཟི་བརྗིད་ཆེ་བའི་ལྷ་མོ།
དག་པ་གསུམ་ལྡན་ཡུམ་ལ་ཕྱག་འཚལ།། ཞེས་བྱ་སྟེ། ཧི་ཡི་ས་བོན་ནི། འབུམ་ལྟར་ན། སྤྲུལ་པའི་སྐུ་རང་རིག་པའི་ཁམས་ཉིད་དུ་བསྟན་པའི་ཡུམ་མོ། གཟུངས་ལྟར་ན། མི་གཙང་སྐྱོན་སྒྲིབ་རྣམས་འཇོམས་པར་མཛད་པའི་བྱམས་མ་སྟེ། སྐྱོན་གྱི་འཇིགས་སྐྱོབས་མའོ། མདོ་ལྟར་ན། ཀུན་སྐྱོབས་རང་རིག་བྱམས་མ་ཞེས། ཚེ་ལོ་སྟོང་པའི་སངས་རྒྱས་བསྐྱེད་པའི་རྒྱལ་ཡུམ་གཟི་བརྗིད་ཆེ་བར་བསྟན་པའི་ལྷ་མོ་ཞེས་སོ། སྒྲིབ་གསུམ་རྣམ་པར་དག་པ་གསུམ་དང་ལྡན་པའི་ཡུམ་དེ་ལ་ཕྱག་འཚལ་ལོ། ཞེས་སོ།
མོ་ནི་གཡོ་མེད་ངོ་བོ་ཉིད་སྐུ།
།འཆི་བའི་འཇིགས་ལ་ཚེ་མཆོག་སྦྱིན་མ།
།ཀུན་རིགས་མཚམས་སྦྱོར་ཐུགས་རྗེ་ཐབས་མཁས།
།མངོན་གསུམ་སྣང་མཛད་ཡུམ་ལ་ཕྱག་འཚལ།། ཞེས་བྱ་སྟེ།
མོ་ཡི་ས་བོན་ནི། འབུམ་ལྟར་ན། གཡུང་དྲུང་དབྱིངས་ཁམས་གཡོ་མེད་ངོ་བོ་ཉིད་ཀྱི་སྐུ་རུ་བསྟན་པའི་ཡུམ་མོ། གཟུངས་ལྟར་ན། འཆི་བའི་འཇིགས་པ་ཅན་ལ་ཚེ་ཡི་མཆོག་སྦྱིན་མ་སྟེ། ཚེ་ཡི་འཇིགས་སྐྱོབས་མའོ། མདོ་ལྟར་ན། ཀུན་རིགས་རྒྱལ་བཞེད་བྱམས་མ་ཞེས། ད་ལྟ་ཚེ་ལོ་བརྒྱ་པའི་མགོན་པོ་སྟོན་པ་གཤེན་རབ་བསྐྱེད་པའི་མཚམས་སྦྱོར་ཐུགས་རྗེ་ཐབས་ལ་མཁས་པའི་ཡུམ་ཞེས་སོ། མིང་ཙམ་མིན་པར་ད་ལྟ་མངོན་གསུམ་དུ་སྣང་བར་མཛད་པའི་ཡུམ་དེ་ལ་ཕྱག་འཚལ་ལོ། ཞེས་སོ།།
ཧ་ནི་ངོ་བོ་ཉིད་ཀྱི་ཆེ་བ།
།གཟའ་སྐར་སྡེ་བརྒྱད་མ་ལུས་འདུལ་མ།
།ཀུན་འདུལ་མ་ལུས་སངས་རྒྱས་བསྐྱེད་བྱེད།
།གནས་གསུམ་དག་པའི་ཡུམ་ལ་ཕྱག་འཚལ།། ཞེས་བྱ་སྟེ། ཧ་ནི་འབུམ་ལྟར་ན། མཉམ་པ་ཉིད་ཀྱི་ཁམས་ངོ་བོ་ཉིད་སྐུ་ཆེ་བའི་ངང་ཉིད་དུ་བསྟན་པའི་ཡུམ་མོ། གཟུངས་ལྟར་ན། གཟའ་དང་རྒྱུ་སྐར་སོགས་སྡེ་བརྒྱད་མ་ལུས་འདུལ་བའི་བྱམས་མ་སྟེ། གཟའ་ཡི་འཇིགས་སྐྱོབས་མའོ། མདོ་ལྟར་ན། ཀུན་འདུལ་གསལ་ཐང་བྱམས་མ་སྟེ། མ་འོངས་ཚེ་ལོ་བཅུ་ལ་འབྱོན་པའི་སངས་རྒྱས་བྱམས་ལྡན་མགོན་པོ་ཐང་མ་མེ་སྒྲོན་བསྐྱེད་པར་བྱེད་པའི་ཡུམ་ཞེས་སོ། ལུས་ངག་ཡིད་གསུམ་གྱི་གནས་གསུམ་དག་པར་བསྒྱུར་བའི་ཡུམ་དེ་ལ་ཕྱག་འཚལ་ལོ། ཞེས་སོ།
ཨེ་ནི་ཞི་རྒྱས་དབང་དྲག་རྩ་བ།
།འཕྲིན་ལས་རྣམ་བཞི་དགྱེས་མཛད་ཉིད་མ།
ལྷ་སྨན་མཁའ་འགྲོ་མ་མོའི་ཚོགས་བཅས།
།སྟོབས་བཞི་ལྷུན་གྲུབ་ཡུམ་ལ་ཕྱག་འཚལ།། ཞེས་བྱ་སྟེ། ཨེ་ནི་ས་བོན་ནི། ཞི་བའི་ལས་གྲུབ་ལྷ་མོ་བཅུ་གསུམ། རྒྱས་པའི་ལས་མཛད་སྨན་མོ་བཅུ་གསུམ། དབང་གི་ལས་མཛད་མཁའ་འགྲོ་བཅུ་གསུམ། དྲག་པོའི་ལས་མཛད་མ་མོ་བཅུ་གསུམ་སོགས་རྩ་བ་འཕྲིན་ལས་རྣམ་བཞིའི་དགྱེས་མཛད། བདག་ཉིད་བྱམས་མ་ལྔ་བཅུ་ང་གཉིས་ཚོགས་བཅས་ཏེ། ཞི་རྒྱས་དབང་དྲག་གི་སྟོབས་བཞི་ལྷུན་གྱིས་གྲུབ་པའི་བྱམས་མའི་ཡུམ་དེ་ལ་ཕྱག་འཚལ་བསྟོད། ཅེས་སོ།
མ་ཞེས་བླ་མེད་སྲིད་པའི་བྱམས་ཆེན།
།ཡེ་ཤེས་བཀྲ་ཤིསསྣ་ཚོགས་སྟོན་མ།
།རྣམ་དག་པད་མ་གཡུང་དྲུང་ཀློང་གི
།སྡེ་བཞི་རྒྱས་མཛད་ཡུམ་ལ་ཕྱག་འཚལ།།
ཞེས་བྱ་སྟེ། མ་ཞེས་ས་བོན་ནི། བླ་མེད་ཕར་ཕྱིན་གྱི་ཡུམ་བཅུ། སྲིད་པའི་ལྷ་མོ་བྱམས་ཆེན་བདུན། ཡེ་ཤེས་རྣམ་བརྒྱད་ཀྱི་ཡུམ་བརྒྱད། བཀྲ་ཤིས་རྟགས་བརྒྱད་ཀྱི་ཡུམ་བརྒྱད་སོགས་སྣ་ཚོགས་ཕར་ཕྱིན་གྱི་ཡུམ་བཅུ་སྟོན་པའི་བྱམས་མ། རྣམ་དག་པད་མ་གཡུང་དྲུང་ཀློང་གི་རྒྱུད་ལས་བྱོན་པའི་ཡུམ་སོ་གཉིས། བླ་མེད། ཡེ་ཤེས། བཀྲ་ཤིས།། སྲིད་པ་སྟེ། སྡེ་ཚན་བཞི་རུ་རྒྱས་པར་མཛད་པའི་ཡུམ་དེ་ལ་ཕྱག་འཚལ་ལོ། ཞེས་སོ།
ཧོ་ལས་ཕྱི་ནང་གསང་བ་ཡང་གསང༌།
།མངོན་རྟོགས་ཐབས་དང་གནས་དག་ལམ་འབྱེད།
།བཅུ་དྲུག་ལམ་འབྱེད་མངོན་བཞུགས་ཆེན་མོ།
།སྒོ་བཞི་སྲུང་མཛད་ཡུམ་ལ་ཕྱག་འཚལ།། ཞེས་བྱ་སྟེ། ཧོ་ཡི་ས་བོན་ནི། ཕྱི་མངོན་རྟོགས་རིག་པའི་སྒོ་བཞི། ནང་ཐབས་ཀྱི་ཐར་པའི་སྒོ་བཞི། གསང་བ་གནས་སུ་དག་པའི་སྒོ་བཞི། ཡང་གསང་ལམ་སྐབས་འབྱེད་པའི་སྒོ་བཞི། བྱམས་མ་རྒྱས་པའི་དཀྱིལ་འཁོར་ལ། སྒོ་སྲུང་སྒོ་མ་ཆེན་མོ་བཅུ་དྲུག ཚོགས་སྦྱོར་མཐོང་ལམ་སྒོམ་ལམ་ལམ་བཞི་འབྱེད་ཅིང་མངོན་དུ་བཞུགས་པའི་ཡུམ་ཆེན་མོ་དེ་ལ་ཕྱག་འཚལ་ལོ། ཞེས་སོ།
མ་ཆེན་བྱམས་ཆེན་བརྒྱ་དང་རྩ་བརྒྱད།
།འབུམ་དང་ལུང་དང་རིག་པའི་གནས་མ།
།མདོ་སྡེ་མངའ་དག་རྒྱུད་ཀྱི་དབང་འབུམ།
།མཛོད་དོན་ཕྱོགས་བཞིའི་ཡུམ་ལ་ཕྱག་འཚལ།། ཞེས་བྱ་སྟེ། མ་ནི་བྱམས་ཆེན་བརྒྱ་དང་རྩ་བརྒྱད་སྟེ། འབུམ་སྡེའི་བྱམས་མ་ཉེར་ལྔ་དང༌། ལུང་སྡེའི་བྱམས་མ་ཉེར་ལྔ་དང༌། རིག་པའི་གནས་སྡེ་བྱམས་མ་ཉེར་ལྔ་དང༌། མདོ་སྡེའི་མངའ་བདག་བྱམས་མ་ཉེར་ལྔ་དང༌། རྒྱས་པའི་རྒྱུད་ཀྱི་བྱམས་མ་བརྒྱད་དང༌། བརྒྱ་རྩ་བརྒྱད། ཡོངས་རྫོགས་དབང་འབུམ་གྱི་མཛོད་དོན་གྱི་དཀྱིལ་འཁོར་ཆེན་པོ་བརྒྱ་དང་རྩ་བརྒྱད་གསུངས་པའི་ཡུམ་མཆོག་སྡེ་ཚན་བཞིའི་ཡུམ་ལ་ཕྱག་འཚལ་ལོ། ཞེས་སོ།
ཡེ་ནི་བྱམས་ཆེན་སུམ་བརྒྱ་དྲུག་བཅུ།
།ཁམས་དང་གནས་དང་རིགས་པའི་ཡུལ་ལ།
།ལྟོས་མཛད་འགྲོ་བའི་དོན་དུ་བཞེངས་མ།
།ཡུལ་བཞི་སངས་རྒྱས་ཡུམ་ལ་ཕྱག་འཚལ།། ཞེས་བྱ་སྟེ། ཡེ་ནི་བར་ཁྱམས་ཀྱི་བྱམས་ཆེན་སུམ་བརྒྱ་དྲུག་བཅུ་སྟེ། ཁམས་ལ་ལྟོས་པའི་བྱམས་མ་བརྒྱ་དང་རྩ་བརྒྱད་དང། གནས་ལ་ལྟོས་པའི་བྱམས་མ་བརྒྱ་དང་ཉི་ཤུ། རིགས་ལ་ལྟོས་པའི་བྱམས་མ་བརྒྱ་དང་ཉི་ཤུ། ཡུལ་ལ་ལྟོས་པའི་བྱམས་མ་བཅུ་གཉིས་ཏེ། ལྟོས་མཛད་འགྲོ་བའི་དོན་དུ་བཞེངས་པའི་བྱམས་མ། ཁམས་གནས་རིགས་གསུམ་ཡུལ་དང་བཞིའི་སངས་རྒྱས་མདོ་རྒྱུད་ཆེན་པོ་སུམ་བརྒྱ་དྲུག་ཅུ་བསྟན་པའི་ཡུམ་དེ་ལ་ཕྱག་འཚལ་ལོ། ཞེས་སོ།
རུ་ནི་བྱམས་སྲས་ལྔ་སྟོང་ལྔ་བརྒྱ།
།ཡེ་གཤེན་གཡུང་དྲུང་སེམས་དཔའི་ཡུམ་མ།
།གནམ་ས་སྲིད་པའི་བོན་གཤེན་རྔ་ཐོག
།མུ་བཞི་སྲས་བསྐྱེད་ཡུམ་ལ་ཕྱག་འཚལ།། ཞེས་བྱ་སྟེ། རུ་ཡི་ས་བོན་ནི། བྱམས་སྲས་ཚོགས་སྦྱོར་མཐོང་སྒོམ་སོགས་ཐེག་ཆེན་སློབ་ལམ་བཞི་རེ་རེ་ལའང་ལྔ་སྟོང་ལྔ་བརྒྱ་གཡུང་དྲུང་སེམས་དཔའི་སྡེ་དང༌། ཡེ་གཤེན་གཡུང་དྲུང་སེམས་དཔའ་ཆེན་པོ་སུམ་བརྒྱ་དྲུག་ཅུ་བསྐྱེད་པའི་ཡུམ་བྱམས་མ་དང༌། གནམ་ས་བར་གསུམ་སྲིད་གསུམ་ཡངས་པའི་འཇིག་རྟེན་བོན་གྱི་བསྟན་ལ་ཞུགས་པ་གཤེན་སྲས་ཀྱི་ཕྱག་ཆ་རྔ་གཤང་ཐོག་པ་སྟེ། གཤེན་རབ་རྣམ་རྩོད། རང་རྟོགས་གཤེན་རབ། ཐུགས་རྗེ་སེམས་དཔའ། གཡུང་དྲུང་སེམས་དཔའ་སྟེ། ཐེག་རིམ་བཞིའི་མུ་ལ་ཞུགས་པ་བཞིའི་བྱམས་སྲས་རྣམས་དང༌། དེ་དག་ལ་བསྐྱེད་པའི་ཡུམ་ལ་ཕྱག་འཚལ་ལོ། ཞེས་སོ།
པ་ནི་བྱམས་ཕྲན་འབུམ་ཕྲག་མཐའ་ཡས།
།ལྷ་མོ་སྨན་མོ་འཁའ་འགྲོ་མ་མོ།
།སྣ་ཚོགས་སྤྲུལ་སྐུ་འགྲོ་དོན་མངོན་བཞུགས།
།ཚོགས་བཞི་དཔག་མེད་ཡུམ་ལ་ཕྱག་འཚལ།། ཞེས་བྱ་སྟེ། པ་ཡི་ས་བོན་ནི། བྱམས་མའི་ཕྱི་འཁོར་དུ་གཏོགས་པའི་བྱམས་ཕྲན་འབུམ་ཕྲག་མཐའ་ཡས་ཏེ། ཤར་ཐབས་ཀྱི་བྱམས་མའི་ཕྱི་འཁོར་ཞི་བའི་ལྷ་མོ་འབུམ་ཕྲག་བཅུ་གསུམ། བྱང་ནམ་མཁའ་མཛོད་འཛིན་མའི་ཕྱི་འཁོར་རྒྱས་པའི་སྨན་མོ་འབུམ་བཅུ་གསུམ། ནུབ་ཐུགས་རྗེ་བྱམས་མའི་ཕྱི་འཁོར་དབང་གི་མཁའ་འགྲོ་འབུམ་ཕྲག་བཅུ་གསུམ། ལྷོ་སྟོབས་ཀྱི་བྱམས་མའི་ཕྱི་འཁོར་དྲག་པོའི་མ་མོ་འབུམ་ཕྲག་བཅུ་གསུམ་སྟེ། ཕྲིན་ལས་སྣ་ཚོགས་སྒྲུབ་ཕྱིར་སྤྲུལ་པའི་སྐུ་འགྲོ་བའི་དོན་དུ་འདས་དང་མ་འདས་པའི་ཞིང་ཀུན་ཏུ་མངོན་པར་རྒྱུན་དུ་བཞུགས་པ་རིགས་བཞིའི་མ་ཚོགས་དཔག་ཏུ་མེད་པའི་ཡུམ་ལ་ཕྱག་འཚལ་ལོ། ཞེས་སོ།
ཡེ་ནི་རྒྱས་པ་རྒྱ་ཆེའི་ཡུམ་རྣམས།
།ཐུགས་ཀྱི་ཡང་སྙིང་བྱམས་མར་འདུས་མ།
།རྩ་བའི་སྔགས་བསྟོད་འདི་ཡིས་འགྲུབ་མ།
།གསང་གསུམ་མཛོད་འཛིན་ཡུམ་ལ་ཕྱག་འཚལ།། ཞེས་བྱ་སྟེ། ཡེ་ཡི་ས་བོན་ནི། རྒྱས་པ་རྒྱ་ཆེའི་ཡུམ་ནམ་མཁའི་ཁྱབ་ཚད་ཀྱི་བྱམས་སྲས་རྣམས་ཀྱི་ཐུགས་ཀྱི་ཡང་སྙིང་བྱམས་མ་ཆེན་མོའི་ཀློང་དུ་འབྱུང་གནས་ཐིམ་གསུམ་ཀུན་འདུས་བྱམས་མ་ཡིན་པས། རྩ་བའི་མདོ་ལས་བྱུང་བའི་སྔགས་བསྟོད་འདི་ཡིས་ལྷ་དང་ལྷ་མོ་ཐམས་ཅད་འགྲུབ་མ་ཞེས་སོ། སྐུ་གསུང་ཐུགས་ཉིད་གསང་གསུམ་མི་ཟད་ཡེ་ཤེས་ཀྱི་འཁོར་ལོའི་མཛོད་འཛིན་ཡུམ་ལ་ཕྱག་འཚལ་ལོ། ཞེས་སོ།
ཏ་ནི་འཇིག་རྟེན་གསུམ་གྱི་དཔལ་མགོན།
།ལྷ་ཀླུ་གནོད་སྦྱིན་ཕྱོགས་སྐྱོང་འདུལ་མ།
།སྡེ་བརྒྱད་ཀུན་ལ་མངའ་མཛད་ཆེན་མོ།
།འགྲོ་དྲུག་སྒྲོལ་མཛད་ཡུམ་ལ་ཕྱག་འཚལ།། ཞེས་བྱ་སྟེ།
ཏ་ཡི་ས་བོན་ནི། ས་འོག་ས་བླ་ས་སྟེང་བར་གྱི་འཇིག་རྟེན་གསུམ་གྱི་དཔལ་དང་མགོན་པོ། ལྷ་བརྒྱད་ཀླུ་བརྒྱད་གནོད་སྦྱིན་བཞི། ཕྱོགས་སྐྱོང་བཅུ། གཟའ་དང་རྒྱུ་སྐར་ལ་སོགས་དཔལ་མགོན་བདུན་ཅུ་འདུལ་བའི་བྱམས་མ་དང། ལྷ་སྲིན་སྡེ་བརྒྱད་ཀྱི་སྡེ་ཚོགས་ཀུན་ལ་མངའ་མཛད་པའི་བྱམས་མ་ཆེན་མོ་རྣམས་དང༌། འགྲོ་བ་རིགས་དྲུག་ཐམས་ཅད་སྡུག་བསྔལ་ལས་གྲོལ་བར་མཛད་པ་ལྷ་མོ་སུམ་བརྒྱ་མདོ་ཆོག་དང༌། མོ་སྦྱོང་པད་མ་མུན་སེལ་ལས་རྣམ་གྲངས་སོ་སོར་བསྟན་པའི་ཡུམ་རྣམས་ལ་ཕྱག་འཚལ་ལོ། ཞེས་སོ།
འདུ་འདུ་འཁོར་འདས་གཉིས་ལ་གནས་ཀྱི།
།ས་བཅུ་སེམས་དཔའ་རྣམས་ཀྱི་བསྟོད་མ།
།སངས་རྒྱས་མ་ལུས་ཀུན་གྱི་ཡུམ་གཅིག
།ས་གསུམ་འདུལ་མཛད་ཡུམ་ལ་ཕྱག་འཚལ།། ཞེས་བྱ་སྟེ། འདུ་འདུ་ནི། འཁོར་བ་ལས་འདས་པའི་ལམ་གཉིས་གང་རུང་ལ་གནས་པ་ཐེག་གསུམ་གྱི་སོ སྐྱེས་འཕགས་པ་ཀུན་དང༌། ཁྱད་པར་དུ་ཐེག་ཆེན་འཕགས་པ། གཡུང་དྲུང་ས་བཅུའི་སྒོ་ནས་སེམས་ལ་དཔའ་པའི་དྲོད་ཚད་བསྙེམས་པ་རྣམས་ཀྱི་བསྟོད་ཡུལ་བྱམས་མ་དང༌། སངས་རྒྱས་མ་ལུས་པ་ཀུན་བསྐྱེད་པའི་ཡུམ་གཅིག་ཁམས་གསུམ་གྱི་ས་གསུམ་འདུལ་བར་མཛད་པའི་ཡུམ་དེ་ལ་ཕྱག་འཚལ་ལོ། ཞེས་སོ། སྤྱིར་ས་གསུམ་ཞེས་པ་ལའང༌། ཁམས་གསུམ་འཁོར་བའི་ས་དང༌། མོས་པར་སྤྱོད་པའི་ས་དང༌། གཡུང་དྲུང་སེམས་དཔའི་ས་དང་གསུམ་ལ་བཤད་པའང། ཐེག་ཆུང་རྣམ་རྩོད་པའི་ས་དང༌། ཐེག་འབྲིང་རང་རྟོགས་པའི་ས་དང༌། ཐེག་པ་ཆེན་པོའི་ས་དང་གསུམ་ལ་བཤད་པ་དང༌། ཡང་དག་པའི་ས་གསུམ་ནི། གཡུང་དྲུང་སེམས་དཔའི་ས་བརྒྱད་པ་དགུ་པ་བཅུ་པ་གསུམ་ལ་བཤད་པ་སོགས་མང་དུ་ཡོད་ཀྱང༌། བྱམས་མའི་སྐྱབས་འགྲོ་ལས་གསུངས་པ་ནི། ཐེག་པ་གསུམ་གྱི་ས་ལ་འདོད་དེ། སྤངས་རྟོགས་ལམ་གྱི་སྣ་འདྲེན། ཞེས་གསུངས་པའི་ཕྱིར། སྐབས་འདི་ནི་ཁམས་གསུམ་གྱི་ས་ལ་འདོད་དེ། འདུལ་མཛད་ཅེས་པའི་ཚིག་དང་འབྲེལ་བས་སོ།
སྭ་ཡི་ཡི་གེ་རྫོགས་པའི་བར་དེར།
།ཀུན་གསལ་འབུམ་ལྔ་ཁམས་བརྒྱད་བྱམས་མ།
།ཤེས་དང་ཤེས་བྱ་མ་ལུས་ཉིད་དོན།
།མཐའ་གསུམ་བྲལ་གྱུར་ཡུམ་ལ་ཕྱག་འཚལ།། ཞེས་བྱ་སྟེ། སྙིང་པོའི་དབུས་ནས་སྭ་ཡི་ཡི་གེ་རྫོགས་པའི་བར་དེར། ཀུན་གསལ་འབུམ་ལྔ་ཁམས་ཆེན་བརྒྱད་སོགས་ཀྱི་བྱམས་མ་ཕྱི་ནང་གསང་བའི་དོན་རྣམས་ལ། ཤེས་བྱེད་བློ་དང་ཤེས་བྱའི་ཡུལ་དང་ཤེས་པའི་ཚུལ་ཏེ། མ་ལུས་འདུས་པའི་ངོ་བོ་ཉིད་ཀྱི་དོན་ནི་འཁོར་གསུམ་དུ་རྣམ་པར་མི་རྟོག་པའི་ངང་ལས་བསྡུ་བའོ། སྔོན་དང་མ་འོངས་ད་ལྟའི་མཐའ་གསུམ་མམ། རྟག་ཆད་ཡོད་མེད་སྣང་སྟོང་གཉིས་འཛིན་གྱི་མཐའ་དང་མཐའ་གསུམ་བྲལ་བར་འགྱུར་བའི་ཡུམ་དེ་ལ་ཕྱག་འཚལ་ལོ། ཞེས་སོ།
ཧཱ་ནི་མདོ་ཡི་སངས་རྒྱས་ཡུམ་སྟེ།
།བདེ་བར་གཤེགས་པ་བླ་ན་མེད་པ།
།ཡང་དག་མངོན་པར་རྫོགས་པའི་སངས་རྒྱས།
།བྱམས་མ་ཆེན་མོ་ཡུམ་ལ་ཕྱག་འཚལ།། ཞེས་བྱ་སྟེ། ཡང་ཧཱ་ཡི་ངོ་བོ་ནི། བྱམས་མ་རྩ་བའི་མདོ་ཡི་ནང་ལས་བྱུང་བ་བསྐལ་བཟང་སངས་རྒྱས་སྟོང་རྩ་གཉིས་ལ་སོགས་སངས་རྒྱས་སྟོན་པ་ཐམས་ཅད་བསྐྱེད་པའི་ཡུམ་སྟེ། སྟེ་ཞེས་པ་ནི་ལྷག་བཅས་ཀྱི་སྒྲ་སྟེ། སླར་ཡང་མདོ་ཡི་ཡུམ་དེ་གཙོར་བཟུང་ནས་དེ་ལ་སོགས་ཏེ། བདེ་བ་ཆེན་པོའི་དབྱིངས་སུ་ཞི་བར་གཤེགས་པ་བླ་ན་མེད་པ་མངོན་དུ་བརྙེས་ཤིང་ཡང་དག་པ་མངོན་པར་རྫོགས་པའི་སངས་རྒྱས། སྐྱེ་དགུ་ཡོངས་ལ་བུ་གཅིག་ལྟ་བུར་བྱམས་སེམས་བརྩེ་བར་མཛད་པའི་མ་གཅིག ཤེས་རབ་ཀྱི་བླ་ན་མེད་པའི་བྱམས་མ་ཆེན་མོ་ཤེས་རབ་ཀྱི་ཕ་རོལ་དུ་ཕྱིན་པའི་ཡུམ་གཙོ་འཁོར་ཀུན་ལ་རྟག་ཏུ་མི་འབྲལ་བའི་དད་མོས་དྲག་པོས་ཕྱག་འཚལ། ཞེས་སོ། སླར་ཡང་དེའི་སྙིང་པོ། ཨཱོཾ་མ་བ་མ་དེ་མ་ཧི་མོ་ཧ་ཨེ་མ་ཧོ་མ་ཡེ་རུ་པ་ཡེ་ཏ་འདུ་འདུ་སྭ་ཧཱ། ཞེས་ལན་གཅིག་གསུངས་ན། ཕན་ཡོན་མདོ་རུ་སྟོན་པས་གསུངས་པ།
སྔགས་ཀྱི་རྒྱལ་པོ་ཉི་ཤུ་རྩ་གཅིག
།བོན་གྱི་རྒྱལ་པོ་བྱམས་མའི་བསྟོད་པ།
།ལུང་གི་རྒྱལ་པོ་ཀུན་གསལ་ཆེན་མོ།
།བཀའ་ཡི་རྒྱལ་པོ་སྟོན་པས་གསུངས་པ།
།ཉེར་གཅིག་ལེའུ་འཁོར་འདས་མ་ལུས།
།མཚན་བརྗོད་ཐམས་ཅད་ཚངས་པར་ཉིད་དོ།
།འདི་བཀློག་བོན་རྣམས་རྫོགས་པར་འགྱུར་ཏེ།
།ཕན་ཡོན་བསམ་མཐའ་ཡས་པར་ཐོབ་བོ།། ཞེས་གསུངས་པ་དེའི་དོན་ཡང། བྱམས་མ་རྩ་བའི་སྔགས་སྙིང་པོ་འབྲུ་ཉེར་གཅིག་པ་འདི་ནི་གསང་རིགས་གཟུངས་གསུམ་གྱི་སྔགས་ཐམས་ཅད་ཀྱི་རྒྱལ་པོ་ལྟ་བུའི་སྙིང་པོ་ཉི་ཤུ་རྩ་གཅིག་པའོ།

བོན་ཉན་པའི་ཡོན་ཏན།

(ཁྲོ་བོ་རྒྱུད་དྲུག་ལས་དྲངས།)
དག་པའི་ཡོན་ཏན་ལ་འདིར་དག་པས། ཚེ་འདིར་ནད་ཉུང། རྟེན་མཛེས། ཕྱག་སྐྱབས་ཀྱི་ཡུལ་དུ་འགྱུར་བ་ལ་སོགས་དང་ལྡན་ཅིང་ཕྱི་མར་དལ་འབྱོར་ཕུན་སུམ་འཚོགས་པར་བརྒྱུད་དེ་མཐར་འགྱུར་བ་མེད་པའི་སྐུ་ཐོབ་ལ། ངག་དག་པས་འདིར་ངག་གཞན་ལ་བཀའ་བཙན་པ་དང། སྔགས་འཛབ་སྙིང་པོའི་ནུས་པ་ཆེ་བ་དང༌། ཀུན་གྱིས་བསྔགས་པ་བརྗོད་པ་ལ་སོགས་དང་ལྡན་ཞིང་ཕྱི་མར་ངག་ཞི་ལ་སོགས་ཀྱི་ཡོན་ཏན་དང་ལྡན་ཏེ་མཐར་རང་བཞིན་མེད་པའི་གསུང་ཐོབ་ལ། ཡིད་དག་པས་འདིར་བསམ་པ་འགྲུབ་ཅིང་གཞུང་དོན་རྟོགས་པ་ལ་སོགས་དང་ལྡན་ཞིང་ཕྱི་མར་བློ་གསལ་བ་ལ་སོགས་པ་དང་ལྡན་ཏེ་མཐར་འཁྲུལ་པ་མེད་པའི་ཐུགས་ཐོབ་པར་འགྱུར་ཏེ། ལས་རྒྱུད་ལས། ལུས་ངག་ཡིད་གསུམ་དག་སྤྱད་ན། སྐྱེ་བ་གཅིག་གིས་མངོན་སངས་རྒྱས། ཞེས་གསུངས་སོ།

གཡུང་དྲུང་བོན་གྱི་འཆད་ཉན་གྱི་སྐོར།

(ཁྲོ་བོ་རྒྱུད་དྲུག་ལས་དྲངས།)
བཤད་ཅིང་ཉན་པའི་ཚུལ་ལ་གསུམ་སྟེ། སྔོན་འགྲོ་དངོས་གཞི་རྗེས་ཀྱི་བྱ་བ་དང་གསུམ་མོ། དང་པོ་སྔོན་དུ་འགྲོ་བ་བྱང་ཆུབ་མཆོག་ཏུ་སེམས་བསྐྱེད་པ་གཙོ་བོ་ཡིན་ཏེ། དེ་ཡང་དཔོན་སློབ་གཉིས་ཀས་འཇིག་རྟེན་གྱི་ཁེངས་གྲགས་རང་དོན་རྐྱང་པ་ལ་སོགས་དོར་ལ་སེམས་ཅན་ཐམས་ཅད་རྫོགས་པའི་བྱང་ཆུབ་ཐོབ་པར་བྱ་བའི་དོན་དུ་བཤད་ཉན་ལ་འཇུག་པར་བྱ་སྟེ། སེམས་བསྐྱེད་སྔོན་དུ་མ་སྐྱལ་ཞིང་པས་རྒྱུ་བརྗེད་འདྲ། སེམས་བསྐྱེད་དོན་དང་ལྡན་པའི་གཤེན་རབ་ནི། མཁའ་ལ་ཆར་བབ་རྒྱ་མཚོའི་རུ་མ་འདྲ། ཞེས་གསུངས་པའོ། གཉིས་པ་དངོས་གཞི་ལ་གཉིས་ལས། དང་པོ་འཆད་པ་པོས་ཇི་ལྟར་བཤད་པ་ལ་ལུས་མ་དག་པ་སྲོག་གཅོད་པ་ལ་སོགས་མི་དགེ་བ་དང༌། ཉན་པ་པོ་ལ་རྒྱབ་སྟོན་པ་ལ་སོགས་པ་རྣམ་འགྱུར་མ་དག་པ་དག་ཡོངས་སུ་སྤངས་ལ། རྣམ་པར་དག་པ་ལུས་ཀྱི་དགེ་བ་དང་འབྲེལ་བའི་སྒོ་ནས་རྟེན་སྔགས་བཙུན་ལ་སོགས་གང་ཡིན་ཀྱང༌། རང་རང་གི་གདན་ནབ་བཟའ་རྒྱན་ཆ་ལུགས་ཡོངས་སུ་རྫོགས་པ་དག་དགའ་བ་དང་བརྗིད་པའི་སྒོ་ནས་བཤད་པར་བྱ་སྟེ། འབུམ་ལས། སྟོན་པ་གཤེན་རབ་མི་བོ་ནི་གསས་མཁར་རི་རབ་དཔེར་བཞག་གི་ནང་ན། ཤེལ་གྱི་སེང་གེ་བཞི་བཞི་བརྒྱད་ཀྱི་ཁྲི་ལ་ནི་བཞུགས། དབུ་ལ་རིན་པོ་ཆེའི་པྲོག་ཞུ་ནི་གསོལ། ཕྱག་ན་སྲིད་པ་སྐོས་ཀྱི་ཆགས་ཤིང་ནི་བསྣམས་ནས་དགའ་བའི་མདངས་དང་བརྗིད་པའི་ཚུལ་གྱིས་སེམས་ཅན་རྣམས་ལ་བོན་སྟོན་ཞེས་གསུངས་སོ། ངག་གིས་ངག་འཁྱལ་ལ་སོགས་མི་དགེ་བ་དང༌། གླུ་སྒྲུང་བྲེ་མོ་ལ་སོགས་མ་དག་པ་དང༌། མ་བཤད་ལོག་བཤད་ལ་སོགས་པ་ཧ་ཅང་ཐལ་བ་ལ་སོགས་སྤངས་ལ། ངག་གིས་དགེ་བ་དང་འབྲེལ་བའི་སྒོ་ནས་གཙང་ལ་དག་པ་གཞུང་གི་དགོངས་པ་ཁྲོལ་བར་བཤད་པར་བྱ་སྟེ། གབ་པ་ལས། བདེན་པའི་ཚིག་དང་དོན་དུ་སྦྲེལ་ཞིང་དཀྱུས་ནས་འབྱུང་བ་བཞིན་ཞིབ་ཏུ་བཤད་པ་ལ་བྱའོ། ཞེས་གསུངས་སོ། ཡིད་ཀྱིས་མངན་སེམས་ལ་སོགས་མི་དགེ་བ་དང༌། ཞེ་སྡང་ལས་སོགས་ཉོན་མོངས་དང༌། སྙན་གྲགས་ལ་སོགས་མ་དག་པ་རྣམས་སྤངས་ལ། ཡིད་དག་པ་སེམས་བསྐྱེད་དང་དགེ་བ་འབྲེལ་བའི་སྒོ་ནས་བཤད་པར་བྱ་སྟེ། འབུམ་ལས། སེམས་ཅན་རྣམས་ཡོངས་སུ་སྨིན་ཅིང་འཁོར་རྣམས་ཤེས་པའི་རྒྱུད་སྦྱོང་བའི་ཕྱིར་བཤད་ཀྱིས། འདི་ལ་རབ་ཏུ་ཉོན་ཅིག་ཅེས་གསུངས་སོ། གཉིས་པ་ཉན་པ་པོས་ཉན་ཚུལ་ལ་ལུས་ཀྱིས་མི་དགེ་བ་དང་ཁྲི་དང་ཤ་ཉལ་ལ་སོགས་སྤངས་ལ། ཅོག་པུའམ་པུས་བཙུགས་ལ་སོགས་དག་པའི་སྒོ་ནས་ཉན་ཏེ། མདོ་ལས་ཀྱང༌། ལུས་ཀྱང་ཐུད་ལ་ཡན་ལག་གསུམ་པུས་མོ་ཚུགས་ལ་ཐལ་མོ་སྦྱོར་ཞེས་གསུངས་སོ། ངག་གིས་ངག་འཁྱལ་བླ་བོ་ལ་སོགས་སྤངས་ལ། སྨྲ་བཅད་ཀྱི་ཚུལ་དུ་ཉན་པར་བྱ་སྟེ། སེམས་ཕྲན་ལས། ངག་ཁ་ལག་གཞན་དང་མ་འདྲེས་པར་བསྒྲུབ་ན་འགྲུབ་ཅེས་གསུངས་སོ། ཡིད་ཀྱིས་མི་དགེ་དུག་ལྔ་རང་དོན་ལ་སོགས་སྤངས་ལ། སེམས་བསྐྱེད་དང་འབྲེལ་བའི་སྒོ་ནས་མ་ཡེངས་པར་དད་པས་ཉན་ཏེ། མདོ་ལས། དབང་པོ་མ་ཡེངས་བརྟན་པར་ཉོན། ཅི་འདོད་སེམས་ཀྱི་དཀྱིལ་དུ་བཤད། ཅེས་གསུངས་སོ། གསུམ་པ་རྗེས་ཀྱི་བྱ་བ་བྱང་ཆུབ་ཏུ་བསྔོ་བ་སྟེ། དེ་ཡང་བཤད་ཉན་ལས་སོགས་རང་དང་གཞན་གྱིས་དུས་གསུམ་དུ་བསགས་པའི་དགེ་བ་བློས་བསྡུས་པ་ཐམས་ཅད་རྫོགས་པའི་བྱང་ཆུབ་ཏུ་བསྔོ་བ་སྟེ། ཚུལ་ནི་མི་དམིགས་པའི་ཤེས་རབ་རྣམ་པར་དག་པས་བསྔོ་ཞིང་ཡུལ་ནི་རང་གཅིག་པུའི་དོན་མ་ཡིན་གྱིས་འགྲོ་བ་ཐ་དག་གི་དོན་དུ་བསྔོ་བ་སྟེ། འབུམ་ལས། དགེ་བ་ཉུང་ཞིང་བསམ་པ་ཆུང་བའི་སེམས་ཅན་ཐམས་ཅད་དང་ཐུན་མོང་དུ་བྱས་སྟེ་བླ་ན་མེད་པའི་བྱང་ཆུབ་ཏུ་བསྔོས་པས་དེ་བཞིན་ཉིད་རྣམ་པར་དག་པའི་འབྲས་བུ་ཐོབ་པར་འགྱུར་ཞེས་དང༌། སྦྱིན་པའི་རྒྱུ་དང༌། གནས་དང༌། ལམ་དང༌། དེ་བཞིན་ཉིད་མི་དམིགས་པའི་ངང་ལ་བཞག་ན་རྒྱ་ཆེ་ཞེས་གསུངས་སོ། ད་གསུམ་པ་འབྲས་བུ་ལ་གཉིས་ལས། མ་དག་པ་ཉེས་དམིགས་ཀྱི་འབྲས་བུ་ནི་ལུས་མ་དག་པས་ཚེ་འདིར་ཚེ་ཐུང་ནད་མང༌། རྟེན་མི་མཛེས་པ། གཞན་གྱི་ཕྱག་སྐྱབས་ཀྱི་ཡུལ་དུ་མི་འགྱུར་བ་ལ་སོགས་འབྱུང་ལ་དེས་ཕྱི་མ་ལ་ཡང་མི་ཁོམ་གནས་བརྒྱད་ཀྱི་ལུས་བླངས་ནས་མཐར་དམྱལ་བ་གཅོད་སྦྱོང་དུ་སྐྱེ་བར་འགྱུར་ལ། ངག་མ་དག་པས་འདིར་གཞན་ལ་བཀའ་མི་བཙན། སྔགས་འཛབ་སྙིང་པོའི་ནུས་པ་ཟད། ཀུན་གྱིས་ཡ་ག་འདུ་བའི་གནས་སུ་གྱུར་ནས་ཕྱི་མ་ལ་ཡང་ལྐུགས་པའམ་ཚིག་རྩུབ་སྨྲ་བ་ལ་སོགས་སུ་གྱུར་ཏེ་མཐར་དམྱལ་བ་ལྕེ་ལ་ཞིང་རྨོ་བ་ལ་སོགས་སུ་འགྱུར་ལ། ཡིད་མ་དག་པས་འདིར་བསམ་པ་མི་འགྲུབ་ཅིང་གཞུང་གི་བརྗོད་བྱ་མི་རྟོགས་པ་ལ་སོགས་སུ་གྱུར་ནས། ཕྱི་མར་ཡང་གླེན་ཞིང་རྨུགས་པ་ལ་སོགས་སུ་གྱུར་ནས་མཐར་བྱོལ་སོང་གི་གླིང་དུ་སྐྱེ་བར་འགྱུར་བ་སྟེ། ལས་རྒྱུད་ལས། བསམ་པ་སྦྱོར་བ་བརྣག་པ་ཡིས། གནས་ངན་གསུམ་དུ་ལྟུང་བར་བྱེད། ཅེས་གསུངས་སོ།